BENVIDOS AO BLOG DA AULA DE APOIO DO NOSO COLE

Bo día nenos e nenas!

Quero compartir con vosoutros/as algunhas das tarefas que podemos facer na casa se non dispoñemos nin de ordenador nin de impresora.

DEBUXAR

Estou segura que xa fixestes unha morea de debuxos…. E algúns/as estaredes xa fartos…

Pero sempre é unha actividade que nos permite relaxarnos e deixar libre a nosa imaxinación!!

Así que anímate a decorar os rincóns da túa casa cos vosos debuxos que dan alegría.

ESCRIBIR

Cada día podemos facer unha pequena redacción (un pequeno diario) sobre o que fixemos o dia anterior. Non ten porque ser moi longa, o que si é importante e que vos fixedes no que escribides e que o volvades a ler para comprobar se ten sentido e poder revisar as faltas de ortografía.

Podedes construír esta redacción da seguinte maneira:

-Primeiro pensa no que vas escribir, planifica.

-E despois escríbeo en oracións non moi longas.

Intenta sempre facelo coa mellor letra que podas facer!

INVENTAR PROBLEMAS

Podemos coller a nosa libreta e inventar problemas como os que nos poñían no cole… e despois como non… resolvelos!

FACER PUZZLES

Seguro que na casa tedes varios puzzles... pois aproveitemos para facelos!

Sabiades que os puzzles melloran a nosa memoria visual, desenvolven a concentración e estimulan a nosa habilidade espacial e matemática, etc.. entre outras moitas cousas... ?

Así que mirade a de cousas que facemos cando estamos a realizar un puzzle!!!

CONSTRUIMOS UN RELOXO

Coa axuda dun prato de plástico ou  recortando un circulo grande nun cartón (podemos aproveitar a caixa das galletas ou cereais), colocamos os 12 números que corresponderán as horas repartidas da seguinte maneira:

Despois...temos que debuxar e recortar dúas frechas: unha grande que corresponderá as horas e outra pequena que será a que nos indique os minutos....

Move as agullas... e xoga cos teus familiares a adiviñar as horas!

FACER PULSEIRAS e colares

Podemos elaborar pulseiras de moitas maneiras... e así traballaremos a psicomotricidade fina nas mans.

Ensartando boliñas /abelorios / contas nun fío ou en lá ..... Tamén podemos utilizar botóns ou calquera cousa que teñades por casa!

Podemos alternar as cores... e facer series con elas....

E seguro que na nosa casa atoparemos macarróns.. e se son de varias cores... pois podemos facer tamén colares alternando os cores e facendo series.

XOGOS DE MESA

É un bo momento para traballar os xogos de mesa como:

·        O DOMINÓ.

O Dominó é un xogo moi sinxelo e ideal para xogar coa familia. Se non sabedes como se xoga, pedídelle a un maior da vos ensine porque é moi doado.

 É unha actividade que ademais de favorecer a concentración e a memoria para pensar en estratexias e así poder gañar a partida, mellora o noso coñecemento matemático.

Se non tes na casa o dominó, sempre o podes facer, so precisas cartolina, rotulador, regra e unhas tesoiras.

·        AS CARTAS

Podemos aproveitar calquera tipo de cartas que teñamos por casa e xogar por exemplo ao CINQUILLO que trata de ordenar e organizar as cartas por palos o que nos axudará a traballar a axilidade mental e empregar estratexias.

·        O PARCHIS.

Ao igual que ocorría co dominó, o parchís axúdanos a favorecer o aprendizaxe dos números, do cónteo, da suma e de situar o anterior e posterior dun número,  por iso vos animamos a xogar unhas partidiñas coa vosa familia.

Se non dispós del,  sempre o podedes facer cunha cartolina branca, rotuladores ou lapis de cores (negro, azul, vermello, amarelo e verde) e unha regra.  

Calquera xogo de mesa é unha boa opción e seguro que dispoñedes de moitos na casa.

Estes xogos axudan aos nenos/as a aumentar a axilidade numérica ou a memoria, tamén adquiren habilidades como a de seguir unhas normas, saber respectar quendas e tamén, non menos importante, habilidades como saber gañar ou saber perder, tan útil na vida. Ademais de reforzar os lazos familiares, a confianza nun mesmo e a rivalidade saudable

E como non... Temos que aproveitar para LER , LER TODO O QUE POIDADES...

Podemos ler calquera cousa que nos atopemos.... as etiquetas dos alimentos... dos produtos de limpeza, as receitas que fan os maiores para cociñar, os contos que temos pola casa, as revistas, as instrucións dos xogos,... etc.. E sempre que non entendamos algo.... pois non vos esquezades de preguntarlle alguén que teñades preto... e se non pode nese momento... pois marcarmos esa dúbida... e xa lle preguntaremos mais tarde... pero non vos quededes con ela!

Ahh e tamén temos que aproveitar a ler números... os números están en todas as partes, no calendario, nas páxinas dos libros, nas etiquetas dos produtos para indicar o pesa ou a capacidade, etc.

Pois hoxe non vos aturulo mais... outro día poñerei outras propostas que vos poden ser de axuda!

Un bico na distancia

E esperamos vernos pronto todos xuntiños no cole!

Bibiana. Mestra de Apoio